ملتان میں جناب سعید ہندی کی ملاقات ایک نابینا مگر عالم و عارف شخص بصیر ہندی (ملتانی) سے ہو گئی۔ کہا جاتا ہے کہ یہ سید جلال بخاری کی اولاد سے تھےاور فرقہ جلالیہ سے اُن کا تعلق تھا۔ جناب سعید ہندی کے ذریعے بصیر ہندی حضرت باب پر ایمان لائے۔ اور پھر فوراً آپ کے دیدار کے لئے شیراز روانہ ہو گئے۔ شیراز پہنچے تو معلوم ہوا کہ حضرت باب کو آذربائیجان کے پہاڑوں میں قید کر دیا گیا ہے اور اور اُن سے ملاقات آسان نہیں ہے۔ چنانچہ بصیر ہندی ملتانی جن کو قدرت نے عجیب بصیرت عطا کی تھی حضرت بہآءاللہ کے محل تولدّ طہران پہنچے اور اس شہر کی زیارت کی۔ یہاں سے آپ نے قلعہ شیخ طبر سی جا کر اصحاب قلعہ سے ملاقات کی پھر نور (مازندران) میں حضرت بہآءاللہ کے حضور مشرف ہوئے۔ اور آخرکار ایران میں ہی شہید کر دئیے گئے۔

بمبئی کے ان حضرات افنان نے حضرت بہآءاللہ کے حضور استدعا کی تھی کہ ہندوستان کے لئے کوئی مبلغ مامور فرمایا جائے۔ جس وقت یہ درخواست ساحت اقدس میں پیش ہوئی اس وقت جناب سلیمان خان تنکابنی حضور میں مُشرف تھے ۔ چنانچہ حضرت بہآءاللہ نے سلیمان خان کو "جمال الدین" اور "لمیع" کے القاب عنایت فرمائے اور برصغیر پاک و ہند اور برما میں تعلیمات پھیلانے کے لئے مامور فرمایا۔ جناب سلیمان خان جو جمال آفندی کے نام سے مشہور ہوئے اس سے پہلے کچھ مدّت تک تُرکی میں امراللہ کی تعلیمات پھیلانے کے لئے قیام کر چکے تھے۔ آپ عربی ،فارسی اور ترکی جانتے تھے۔ اُن کا عرفان عمیق، علم ٹھوس،اخلاق پسندیدہ،بیان شیریں اور رفتار متین تھی۔ وہ بڑی با رعب شخصیت کے مالک تھے۔عارف و سالک اور جہانگرد تھے۔ اُن کا چہرہ نورانی اورپرُکشش تھا۔ سفید گھنی ریش رکھتے تھے۔ اور سر پر تاج درویشانہ خوب سجتا تھا۔ آپ حکم مبارک ملتے ہی تیار ہو گئے۔ ایک بہآئی دوست میرزا حسن کی معیت میں پورٹ سعید پہنچے اور وہاں سے بذریعہ کشتی بمبئی آئے۔ جمال آفندی بمبئی اور دیگر علاقوں میں امراللہ کی تعلیمات عام کرنے لگے۔ جہاں جاتے اعیان شہر ، علماء ، صوفیا اور طبقہ امراء کو امر بہآئی کی تعلیمات سے روشناس کراتے۔ تعلیمات مبارکہ کی بدولت برصغیر میں تجدد و اصلاح کی کئی تحریکیں اُبھریں جن میں ایک آریہ سماج کی تحریک ہے۔

حضرت جمال آفندی نے بر صغیر کے علاوہ برما، سری لنکا،تھائی لینڈ ،سنگا پور،جاوا وغیرہ کا دورہ کیا۔ اس سفر کے دوران جنابٰ مصطفے رومی اُن کے ہمراہ تھے۔ جمال آفندی پہلی مرتبہ ۱۸۷۲ء سے ۱۸۸۴ء تک گیارہ سال سفر کر کے واپس چلے گئے۔مگر پھرحضرت بہآءاللہ نے دوبارہ جناب جمال آفندی کو مامور فرمایا اب آپ حاجی فرج اللہ تفرشی کی رفاقت میں ۲۰ مارچ ۱۸۸۸ء کو ہندوستان آئے۔ اس مرتبہ آپ نے سابقہ مبتدیوں سے ملاقات کے لئے مزید علاقوں کا سفر کیا۔ یہ سفر ڈیڑھ سال تک جاری رہا۔ آپ نے لاہور ،پونچھ،جموں ،کشمیر،تبتّ،لدّاخ ، یارقند، بد خشاں اور بلخ کا سفر کیا۔ انہوں نے لداخ کے کمشنر کے دفتر میں امراللہ کی تعلیمات پہنچائیں کی تو ایک ملازم احمد الدین بہآئی ہوا۔ یہاں سے آپ محرم ۱۸۸۹ء میں سری نگر وارد ہوئے۔ پنجاب و کشمیر اور تبّت کے سفر کے بعد آپ مدارو پہنچے اور وہاں امراللہ کی تعلیمات کو عام کرتے رہے۔

میرزا محمود زرقانی شیراز کے نزدیک قصبہ زرقان کے رہنے والے تھے۔ آپ معروف بہآئی مبلغ میرزا حیدر علی کے ہمراہ امراللہ کا پیغام لوگوں تک پہنچاتے رہے۔ حضرت عبدالبہآء کے حکم مبارک کے مطابق آپ ۱۹۰۲ء میں لاہور پہنچے پھر پنجاب و سرحد کا دورہ کیا ۔ پشاور میں چند دن قیام کیا اور گجرات و پنجاب میں تقریباً چار ماہ رہائش پذیر رہے۔۱۹۰۲ء میں آپ انار کلی میں واقع دفتر ''پیسہ اخبار'' میں بھی قیام فرما رہے۔

معروف بہآئی عالم جناب میرزا محرم کے ذریعے پروفیسر شیرازی ۱۹۰۸ء میں بمبئی میں بہآئی ہوئے۔ اور پھر فارغ التحصیل ہونے کے بعد سندھ میں خدمت امر کرنے لگے۔ انہوں نے میرزا قلیچ بیگ اور گر بخشانی جیسے مشاہیر ادب سے دوستانہ روابط پیدا کئے۔ میرزا قلیچ بیگ نے "ہفت وادی" کا سندھی ترجمہ ''اسرار جو خزانو'' کے نام سے شائع کیا۔ مرحوم شیرازی ڈی جے سندھ کالج میں ۱۹۲۵ء تک فارسی کے پروفیسر رہے۔

جناب مرزا محمود زرقانی نے برصغیر کا دوسرا سفر ۱۹۱۴ء میں کیا اور بمبئی میں قیام پذیر رہے۔ ۱۹۱۹ء میں واپس عکا چلے گئے۔

تیسری مرتبہ جناب مرزا محمود زرقانی جناب مصطفی رومی کے ساتھ بمبئی آئے اور اس اولین بہآئی کانونشن کے انعقاد میں ہمکاری فرمائی جو محفل ملّی کے انتخاب کےلئے اواخر دسمبر ۱۹۲۰ء میں بمبئی میں منعقد ہوا۔

کراچی کے اجباب نے ۱۹۲۱ء میں محفل روحانی تشکیل دی اور ملک کے دوسرے علاقو٘ں کے سفر کرنے لگے۔ کراچی کے اجباب نے ۱۹۲۱ء میں محفل روحانی تشکیل دی اور ملک کے دوسرے علاقو٘ں کے سفر کرنے لگے۔

امراللہ کی تعلیمات زبانی عام کرنے کے ساتھ پاکستان کے یہ مٹھی بھر بہآئی احباب لٹریچر کی طباعت کی ضرورت سےغافل نہ تھے چنانچہ "بہآئی پبلشنگ کمیٹی" کے نام سے کراچی میں ایک ادارہ ۱۹۳۰ء میں قائم کیا جو اب بہآئی پبلشنگ ٹرسٹ (رجسٹرڈ) ہے۔ اس ٹرسٹ کی طرف سے درجنوں بہآئی کتابیں اردو، فارسی، انگریزی میں اور کچھ کتابیں اورپمفلٹ سندھی، پشتو، بلوچی، گوجری اور بلتی میں شائع ہوئیں۔

۱۹۳۲ء تک اردو میں مندرجہ ذیل بہآئی کتابیں شائع ہو چکی تھیں جو زیادہ تر ترجمہ ہیں۔''لوح ابن ذئب، ہفت وادی، دور بہآئی، کتاب آفتاب ظہور، شش الواح، کلمات مکنونہ، باب الحیات، المعیار الصحیح ،وغیرہ۔

کراچی میں ہندو برماکے بہآئیوں کا نوّاں اور دسواں کانونشن ۱۹۳۷ء اور ۱۹۳۸ء میں ہوا۔ اس میں امریکن خاتون محترمہ مارتھاروٹ تشریف لائیں۔ آپ نے یہاں تین ماہ تک قیام کیا۔اور قرۃ العین طاہرہ پر اپنی تحقیقی کتاب ''طاہرہ دی پیور ''شائع کی۔ انہوں نے پنجاب، جموں اور کشمیر کا سفر بھی کیا۔
کتاب ''بہآءاللہ و عصر جدید'' کا اردو اور گجراتی ترجمہ ۱۹۳۷ء میں شائع ہوا

قیام پاکستان کے بعد متعدد بہآئی خاندان ہندوستان سے چلے آئے تھے۔اس طرح نئے مراکزِ امری اور محافل میں اضافہ ہوا۔ ایرانی مہاجرین مقامی احباب اور ہندوستان سے آئے ہوئےدوستوں کی مثلث نے امراللہ کی پیش رفت میں نمایاں اضافہ کر دیا۔ بہآئی مجلہّ "بشارت" کراچی میں علامہ محفوظ الحق علمی کی زیر ادارت چھپنا شروع ہوا۔ پھر یہ مجلہّ "بہآئی میگزین" کے نام سے لاہور اور پھر دوبارہ کراچی سے شائع ہوتا رہا۔موجودہ ماہنامہ "نفحات" اسی سلسلے کی کڑی ہے۔

بانی پاکستان قائد اعظم حضرت محمد علی جناح نے اپنے خطابات میں بار بار وعدہ کیا کہ پاکستان میں مذہبی اقلیتیں عبادات رسم و رواج اور عقائد کی تبلیغ وغیرہ میں آزاد ہوں گی۔ ان کے حقوق اکثریت کے برابر ہوں گے۔ ان کی جان و مال اور عزت و آبرو کا ہر قیمت پر تخفظ کیا جائے گا۔ یہ اسلامی ریاست کا فرض ہو گا کہ وہ ان کی خوشحالی کو یقینی بنائے اور ان کی سلامتی کی ضمانت دے۔ یہ حقیقت ہے کہ پاکستان کی حکومتیں قائداعظم کے ارشادات کی روشنی میں اپنی مذہبی اقلیتوں وغیرہ کا پوری طرح خیال رکھتی رہی ہیں، پاکستان اپنی اس شاندار پالیسی اور روایت پر جس قدر فخر کرے کم ہے، پاکستان کی اقلیتیں بھی ہر امتیازسے بالاتر ہو کر ملک کی ترقی اور ملّت کی خوشحالی کے لئے کام کرتی رہی ہیں اور کر رہی ہیں۔ محبت و ہم آہنگی کی سطح پر یہاں عملاً اقلیت و اکثریت میں کوئی فرق نظر نہیں آتا۔